மனைவியர் தினம் ஆகஸ்ட் 30, Wife_Day_August_30.
இல்லாள் அகத்திருக்க இல்லாதது ஒன்றுமில்லை!
ஓவ்வொரு ஆணும் தனது வாழ்க்கைத்துணையை நன்றியோடு வாழ்த்த ‘ மனைவி நல வேட்பு நாள்’ என்ற கொண்டாட்டத்தை அறிமுகம் செய்தவர் அருட் தந்தை வேதாத்திரி மகரிஷி.
உலகிலே தந்தையர் தினம், அன்னையர் தினம், ஆசிரியர் தினம், குழந்தைகள் தினம், காதலர்கள் தினம், நண்பர்கள் தினம்,மகளிர் தினம், முதியோர் தினம், ஊனமுற்றோர் தினம், என தனித்தனியே கொண்டாடி மகிழ்கின்றனர்.
சுமங்கலி பூஜையை கணவன் நலனுக்காக மனைவியரும் வேண்டுகிறார்கள். குடும்பத்துக்காக தன்னையே அர்ப்பணிக்கும் மனைவிக்கு நன்றி சொல்ல வேண்டாமா? ஓவ்வொரு ஆகஸ்ட் 30 ஆம் திகதி ‘ மனைவி நல வேட்பு நாள்’ உலகெங்குமுள்ள மனவளக்கலை அன்பர்களால் உற்சாகமாகக் கொண்டாடப்படுகிறது.
“கணவன் – மனைவி உறவு” பற்றியும், சிறந்த தம்பதி எப்படி இருக்க வேண்டுமென்றும் அருட்தந்தை அழகாக விபரித்துள்ளார்.
மனைவி அமைவதெல்லாம் இறைவன் கொடுத்த வரம் என்று கவிஞன் அழகாக வர்ணித்துள்ளான். குடும்ப அமைதிக்கு வித்திட்ட என் மகான் மனைவிக்குக் கொடுத்த அன்பு பரிசு” மனைவி நலவேட்பு”
இரு மனங்கள் இணைகிற வைபோகமே திருமணம். இது மனித வாழ்வில் புனிதம் நிறைந்த உறவின் திறவுகோல். ஒருவருக்கொருவர் ஆதரவாகவும், ஆதாரமாகவும் அமையும் இந்த உறவில்தான் நிறைவு வரும். ஞானம் வரும்.
ஒரு ஆணின் வாழ்வு பெண்ணின் வருகையாலும், ஒரு பெண்ணின் வாழ்வு ஆணின் வருகையாலும் இனிமை காண வேண்டும்.: இன்னால் காணக் கூடாது. கணவனும், மனைவியும் ஒருவரை ஒருவர் மனதார விரும்ப வேண்டும்..
முழுமையாக நம்ப வேண்டும்..இருவரின் ரசனையும் ஒரே மாதிரியாக இருக்க வேண்டிய அவசியமில்லை.ஒருவர் ரசனையில் ஒருவர் குறுக்கிடாமல் இருக்கும் பெருந்தன்மையே போதும்.
இந்த உலகில் பெற்ற தாய் தந்தைக்கு அடுத்தபடி ஆறுதல் தருகின்ற, அக்கறைப்படுகின்ற உறவு கணவனுக்கு மனைவியும்,மனைவிக்கு கணவனும் தான்.
ஆண்,பெண் உறவுகளில் நிலவும் ஒழுக்கத்தின் மூலமே உயர்ந்த நாகரிகம் உண்டாகும். இந்த ஒழுக்கத்தை பாதுகாக்கும் கவசமே திருமணமாகும். ஓவ்வொரு கணவன் – மனைவி உறவை உயிரிலும் மேலானதாக மதித்துப் போற்ற வேண்டும்.
உடல், பொருள், ஆற்றல் என்ற மூன்றையும் ஒருவருக்கொருவர் மனதார அர்ப்பணித்து, இன்ப, துன்பங்களில் பங்கு கொண்டும் வாழும் பெருமை கணவன், மனைவி உறவில் தான் அதிகமாக அடங்கியுள்ளது.
தமது பண்பாட்டின்படி பார்த்தால்,பெண்கள் இயற்கையிலேயே தியாகிகள் என்று சொல்லலாம். கணவன் வீட்டுக்கு வரும்போதே தாய் தந்தை, பிறந்த வீட்டுச் சூழ்நிலை எல்லாவற்றையும் துறந்துவிட்டுத்தான் வருகிறார்கள். திருமண வாழ்ககையைத் தொடங்குவதற்கு முன்பே, துறந்து வரக்கூடிய ஒரு இயல்பு அவர்களுக்கு வந்துவிடுகிறது.
இப்படி எல்லாவற்றையும்; துறந்து விட்டு இங்கே அன்பு நாடி வந்த பெண்ணுக்கு ஆதரவு கொடுக்க வேண்டியது அவசியம். இந்த உண்மையை ஒவ்வொரு கணவனும் உணர்ந்துகொள்ள வேண்டும்.
ஒரு மனைவி என்ற மதிப்பு மட்டுமல்ல.. பெண்மையும், தாய்மையும் ததும்பும் எல்லோருக்கும் தர வேண்டிய அதே மதிப்பு நம் வீட்டுக்கு வாழ வந்த பெண்ணுக்கும் உண்டு என்பதை அறிந்து கொள்ள வேண்டும். கணவன்- – மனைவி உறவில் இந்தப் பண்பாடும் தியாகமும் இருந்தால் போதும் அதைவிடப் பெரிய இன்பம் இந்த உலகத்தில் வேறு இருக்க முடியாது.
ஒருவருக்கொருவர் சச்சரவு இல்லாத குடும்பத்தில்தான் குழந்தை நன்றாக இருக்கும். பிரச்சினை உள்ள குடும்பங்களில் அடக்கு முறைக்கு குழந்தைகளின் சுதந்திரம் பறிபோகும்.
இந்தப் போராட்டத்தால் குழந்தையின் உடல்நலமும்,மனநலமும் கெடும். ஒருவருக்கொருவர் விட்டுக் கொடுத்தும் உதவி செய்தும் வாழ்வதுதான் திருமண பந்தம் என்பதைப் புரிந்து கொண்ட வீடுகளில் இந்தப் போராட்டம் இல்லை.
விட்டுக்கொடுப்பதற்குப் பதிலாக, ஒவ்வொருவரும் ஒரு பிடியைப் பிடித்துக் கொண்டு “என் கருத்துதான் உயர்ந்தது” என பிடிவாதம் காட்டினால் பிணக்குதான் வரும்.
கணவனும்,மனைவியும் நட்பின் மதிப்பை உணர்ந்து அதைக் காப்பாற்ற வேண்டிய அவசியத்தை நினைவில் வைத்துக் கொண்டால், மற்ற விஷயங்களில் எந்தக் குறையும் இருக்காது.
ஒரு குடும்பத்தில் கணவன், மனைவி இருவரின் உறவினர்களும்; விருந்தினர்களாக வரவாய்ப்புகள் உண்டு. அவர்களை ஒத்த மதிப்போடு இருவரும் உபசரிப்பது கணவன் – மனைவி இடையே அன்பு வளரச் செய்யும். எளிய உணவேயாயினும் விருந்தினரை உபசரிப்பதில் இன்முகம் காட்டுங்கள்.
‘இறைவனே மனைவி வடிவத்தில் வந்து எனக்குத் துணையாக இருக்கிறான்.’ என கணவன் நினைக்க வேண்டும். மனைவியும் கணவனை இப்படி கடவுளின் வடிவமாகவே தனக்கு உறவாகி வந்ததாக நினைக்க வேண்டும். இப்படி ஒருவரிடம் இன்னொருவர் தெய்வநிலையைக் கண்டுவிட்டால் போதும்.
எத்தனை துன்பங்கள் வந்தாலும் அவற்றை சமாளிக்கும் வலிமை கிடைக்கும். இல்லற வாழ்க்கையில் யாரும் அனுபவித்து இருக்காத மலர்ச்சி கிடைக்கும்.
மனித இனம் வியப்பானது. ஒரு பொருளை விரும்பினால், அதை அடைவதற்கு முன்பு அது பற்றி பல நன்மைகளையும், மேன்மைகளையும் கற்பனை செய்துகொண்டு இன்பம் அடையும். ஆனால், அதை அடைந்தபிறகு, எப்போதும் குறைகளைக் கண்டுபிடித்து சோர்ந்து போகும்.
கணவன் – மனைவி உறவில் முக்கியமாக தவிர்க்க வேண்டியது இதைத்தான். உங்கள் துணையிடம் இருக்கும் நல்ல விஷயங்களையும், உயர்ந்த குணங்களையும் பாராட்டுங்கள். குறைகளை மனதை புண்படுத்தாமல் எடுத்துச் சொல்லி நிறைவு செய்ய முயற்சியுங்கள். வாழ்வு வளம் பெறும், குடும்பம் தழைத்தோங்கும்.
உலகத்திலேயே நட்பு மிக மிகச் சிறந்தது.: பயனுடையது. அதிலும் கணவன் – மனைவி நட்பு பற்றி சாதாரணமாகச் சொல்லிவிட முடியாது. புனிதமான உறவில் தோன்றிய உன்னதமான நட்பு.
இருவருடைய வாழ்க்கையும் மேன்மை பெறவும், குடும்பம் வளர்ச்சி பெறவும், இந்த நட்பே பிரதானமாக தேவைப்படுகிறது. இப்படிப்பட்ட குடும்பத்தில் வளரும் குழந்தைகள் எத்தகைய நற்பண்புகளுடன் திகழும் என்பதை நினைத்துப் பாருங்கள்!
கணவனை மனைவியும், மனைவியை கணவனும் பாராட்ட வேண்டியது மிக மிக அவசியம். .சிறப்பாக எதையாவது செய்தாலும், உயர்வான பண்புகளை வெளிப்படுத்தினாலும் மனம்திறந்து பாராட்டுங்கள். இது அன்பையும், நட்பையும் இறுக்கமாக்கும்.
இதற்காக எப்போதும் எல்லாவற்றையும் பாராட்டிக்கொண்டு இருக்க வேண்டும். என்பதில்லை. அப்படிச்செய்து கொண்டிருந்தால் அது வெறும் முகத்துதி ஆகி மதிப்பு இழந்து விடும். உள்ளதைப் பாராட்டினாலே போதும்.
ருசியாக மனைவி சமைத்துப் பரிமாறினால், “நன்றாக இருக்கிறது” என்று சொல்லலாம். இல்லையா? பலருக்கு இதைச் சொல்ல வராது. .மாற்றிக் கொள்ள வேண்டும். காலை முதல் மாலை வரை நல்ல விஷயங்களைப் பாராட்டிக் கொண்டே இருங்கள். அதுவே பண்பாட்டின் உயர்வு.
சில குடும்பங்களில் கணவனோ, மனைவியோ பலரால் பாராட்டப்படும் பெருமைக்குரிய சாதனையாளராக இருக்கலாம். இப்படி ஊரே தங்களைப் பாராட்டும்போது, தங்கள் வாழ்க்கைத் துணையும் பாராட்டப்பட வேண்டும் என்ற எதிர்பார்ப்பு இருக்கும். ஆனால், அப்படி நினைப்பவர்கள் ஒரு உண்மையை உணர வேண்டும்.
தன் கணவரை ஊரே பாராட்டும்போது அதில் சந்தோஷமும், பூரிப்பும் அடைந்திருப்பார் மனைவி. கணவனும், மனைவியும் இரண்டு உடல்களாகப் பிரிந்திருக்கும் ஒற்றை உயிர்தான் என்ற நம்பிக்கை அவருக்கு இருக்கும். கணவனுக்குக் கிடைக்கும் பாராட்டு தனக்கும் சொந்தமானதே என்ற பூரிப்பில் திளைத்திருப்பார்.
அந்த நினைப்பில் இருக்கும்போது அவருக்கு கணவனைப் பாராட்டத் தோன்றாது. எனவே இதைக் குறையாகவும் எடுத்துக்கொள்ளக் கூடாது. அலட்சியம் செய்வதாகவும் நினைக்கக் கூடாது.
இதேபோல இன்னொரு விஷயத்தையும் புரிந்து கொள்ள வேண்டும். தாங்கள் சொல்லும் கருத்து சரியானதாக இருந்தாலும், அது எத்தனை உயர்வானதாக இருந்தாலும், உங்கள் வாழ்க்கைத்துனை ஒப்புக்கொள்ளா விட்டால்
அதை ஒதுக்கிவைத்து விடுங்கள். அவர் ஏற்றுக்கொள்ளும்வரை காத்திருங்கள். குடும்ப அமைதியை இழந்துவிட்டுப் பெறும் எந்த விஷயத்தாலும் பயன் இல்லை.
பெண்மையைப் போற்றி பணிந்து புகழ்ந்து வாழ்ந்த மனிதன் எப்போதும் கெட்டதில்லை. பெண்ணினத்தை மதிக்காத தனி மனிதனோ,சமுதாயமோ உயர்வடைந்ததாக சரித்திரம் இல்லை. எந்தச் சமுதாயம் பெண்மையை போற்றி அவர்களுக்கு மதிப்பளித்து வாழ்கிறதோ அந்த சமுதாயம்தான் அறிவிலும்,ஆன்மீகத்திலும் சிறப்புற்று விளங்கும்.
மனைவியர் தினமான இந்நன்னாளில் பெற்றோரை, பிறந்த ஊரை,.உறவுகளை பிரிந்து, உங்களுக்கு தொண்டாற்றி, இனிமையாக, இன்பமாக உங்களுக்காக தன்னையே முழுமையாக அர்ப்பணித்து வாழும் அன்புக்கும், பாசத்துக்கும் உரித்துடைய மனைவியை ஒவ்வொரு கணவரும் மதித்து, வாழ்த்தி உங்களின் மாசற்ற அன்பினால் அவர்களை நனைத்திடுங்கள்.
நன்றி இலக்கியா
கருத்துகள் இல்லை:
கருத்துரையிடுக